Настойліва, паслядоўна, старанна
Сярод выхаванцаў Валянціна Сокала былі не толькі тыя, хто займаецца таэкван-до некалькі гадоў і паспеў ужо заявіць пра сябе на розных спартыўных пляцоўках, але і навічкі. І тым больш прыемна трэнеру, што для некаторых з іх гэтая першая паездка дала пачатак іх першым перамогам. Так, дыплом першай ступені заваяваў Кірыл Андрэйкін, трэцяе месца таксама ў навічка і таксама ў Кірыла Ніціеўскага. Акрамя іх, паспяхова выступілі Карына Тозік, Дзмітрый Барысавец і Павел Нікіцін — у іх першыя месцы. Дыпломы другой ступені заваявалі Арцём Гулевіч, Андрэй Махнач, Павел Кульба, Андрэй Лук’янчук, Максім Нікановіч, Аляксандр Піліпенка, Уладзіслаў Купчынскі, Юлія Рыбакова. З узнагародамі трэцяй вартасці з Бабруйска вярнуліся Матвей Зых, Павел Каблаш, Дзяніс Корабаў і Раман Бойка. Іх удалыя выступленні прынеслі і ўсёй камандзе другое месца, перамога — за бабруйчанамі.
Пасля вяртання дадому быў, што называецца, разбор палётаў і работа над памылкамі, а потым зноў трэніроўкі. Пры сустрэчы Валянцін Дзмітрыевіч падзяліўся з намі яшчэ адной сваёй трэнерскай радасцю. Яго былому выхаванцу, а зараз студэнту ўніверсітэта імя Максіма Танка факультэта фізічнага выхавання Міхаілу Кульбу загадам міністра па спорту і турызму РБ ад 1 верасня гэтага года прысвоена званне майстра спорту па таэкван-до. Адносна нядаўна Міхаіл запісаў на свой рахунак яшчэ адзін тытул — выйграўшы тры баі накаўтам у расійскай сталіцы, ён стаў чэмпіёнам Масквы. Зараз таленавіты спартсмен, член нацыянальнай зборнай нашай краіны, рыхтуецца да ўдзелу ў Кубку свету Пятра Вялікага па таэкван-до, які пройдзе на пачатку снежня ў Пецярбургу.
А бяруць пачатак яго поспехі і перамогі ў невялікай спартыўнай зале мясцовага клуба фізічнай падрыхтоўкі. З такіх жа трэніровак, якая трапіла ў аб’ектыў нашага рэдакцыйнага фотаапарата.
Магчыма, хтосьці і з гэтых хлопчыкаў і дзяўчынак таксама даб’ецца значных поспехаў і высокіх спартыўных перамог, калі будзе працаваць настойліва, паслядоўна, старанна.
