Большая частка жывёлагадоўчай прадукцыі вырабляецца ў пашавы перыяд, і за гэты час ёсць магчымасць узяць танную прадукцыю. Менавіта на гэту акалічнасць быў зроблены акцэнт падчас семінара пад кіраўніцтвам старшыні райвыканкама Юрыя Дымшы. Кіраўнікі, спецыялісты галіны жывёлагадоўлі гаспадарак раёна і ўпраўлення сельскай гаспадаркі і харчавання райвыканкама сабраліся разам на малочна-таварнай ферме вёскі Барысаўшчына УКСП “Эксбаза “Глуск” для абмеркавання надзённых пытанняў. У прыватнасці, было зазначана, што да 1 мая гаспадаркам неабходна ўсе статкі, запланаваныя на выпас, вывесці на пашу. А далей стаіць пытанне эфектыўнага выкарыстання за-ліўных лугоў і няўдобіц. Менавіта так у мінулым годзе паступілі ў СВК “Калгас “Слаўгарадскі”, дзе некаторы час пасвілі жывёлу на заліўных лугах і тым самым прыкметна павысілі надоі. На сёння такія магчымасці ёсць у кожнай гаспадарцы і ігнараваць іх нельга.
Больш прадукцыі можна атрымаць, калі на пашах устанавіць перасоўныя даільныя ўстаноўкі. У прыватнасці, у эксбазе, СВК “Дружба”, СВК “Калгас “Зара” аб гэтым паклапаціліся загадзя, таксама закупілі і электрапастухі, таму з выганам кароў на пашу тут праблем няма. Амаль вырашана гэта пытанне ў СВК “Калгас “Слаўгарадскі”, чаго не скажаш пра СВК “Калгас “Зара камуны” і УКСП “Саўгас “Завалочыцы”.
На семінары абмяркоўвалі і праблему камплектацыі статку. Недапушчальна, каб разам з дойнымі каровамі пасвіліся цялушкі. Такая акалічнасць негатыўна сказваецца на прадуктыўнасці. У разрадзе актуальных было і пытанне захаванасці якасці малака, якая напрамую залежыць ад працягласці дойкі, а яна не павінна перавышаць дзвюх з паловай гадзін. Закранулі нават і пытанне паення кароў. Відавочна, што ў малочнай жывёлагадоўлі важна ўлічваць любую дробязь. Таму ад сельгасвытворцаў старшыня райвыканкама патрабаваў сур’ёзных адносін да работы і за пашавы перыяд па максімуму выкарыстоўваць рэзервы для атрымання больш таннай прадукцыі.

Вольга ЧУЧВАЛ