Сямейны вечар адпачынку ў святочны Дзень сям’і наладзілі для 5 шматдзетных сем’яў аграгарадка Засценак Усцярхі ў тамтэйшым сельскім клубе. А каб адпачынак сапраўды бадзёрыў, радаваў і натхняў, гасцям была прапанавана конкурсная праграма. Мэта яе, зразумела, не ў выяўленні лепшых (свае тата і мама для дзяцей заўсёды самыя-самыя), а ў тым, каб у чарговы раз паказаць ім, як добра, як весела адпачываць усім разам, ну і пры гэтым знайсці самую адметную, характэрную рысу кожнай сям’і. І гэта арганізатарам свята (работнікам клуба і сельскай бібліятэкі) удалося на сто працэнтаў. З гэтым згодны самая музычная сям’я Тамары і Альфрэда Савіных, якія ў сваім дзіцячым доме сямейнага тыпу выхоўваюць 12 дзяцей; самая актыўная сям’я Таццяны і Леаніда Кавалевіч, у якіх трое дзяцей; самая вясёлая сям’я Святланы і Сяргея Кандраценяў, у якіх разам з прыёмнымі гадуюцца 5 дзяцей; самая дружная сям’я Любові і Юрыя Скіндзераў, якія нарадзілі і выхоўваюць 5 дзяцей, а таксама самая эрудзіраваная сям’я Таццяны і Міхаіла Сталько, у іх 4 дзяцей. Словам, круг удзельнікаў быў вельмі цесным, бо сабраліся самыя блізкія людзі, бацькі і дзеці, і пры гэтым даволі шырокім, бо сем’і шматдзетныя, а значыць, было па-святочнаму шумна, весела, цікава. І пры гэтым яшчэ карысна, гэтаму спрыяла падрыхтаваная кніжная выстава дзіцячага чытання “Для сыночкаў і лапачак-дочак”.